പാതി വായിച്ചു ഞാൻ അടച്ചു വെക്കുന്ന പുസ്തകങ്ങളിലെ വാക്കുകള്‍
പരസ്പരം ചുംബിക്കുന്നുണ്ടാകണം.
അവരുടെ ആത്മഭാഷണങ്ങളെ അലോസരപ്പെടുത്താതെ
ഞാൻ അകലെ മാറിയിരുന്നു ആ പുസ്തകങ്ങളെയെല്ലാം നോക്കും.
ഒരിക്കൽ എന്റെ കൂട്ടുകാരായിരുന്നവർ..
ചില്ലലമാരകളിൽ ഒട്ടിച്ചേർന്നിരുന്നു അവരിപ്പോൾ അടങ്ങാത്ത പ്രണയത്തിലാണ്.
അവരുടെ സംഗീതം കേള്ക്കുവാൻ എനിക്കിപ്പോൾ കാതുകളില്ല.
ഏകാന്തമായ ഏതോ ഒരു മൌനത്തെ ഞാൻ തേടുന്നുണ്ട്..
ഒരു പുസ്തകം വായിക്കാൻ മാത്രം നിശബ്ദമായൊരു മനസ്സിനെ എന്നേ നഷ്ട്ടപ്പെട്ടിരിക്കുന്നു .